د تخنیکي او څېړنیزو پروژو د پروپوزلونو د چمتو کولو او پراختیا تر سرلیک لاندې دوه ورځنی ورکشاپ تر سره شو.
د تخنیکي او څېړنیزو پروژو د پروپوزلونو د چمتو کولو او پراختیا تر سرلیک لاندې دوه ورځنی ورکشاپ تر سره شو.
د افغان نړیوال اسلامي پوهنتون د کمپیوټر ساینس پوهنځي له خوا د یاد پوهنځي محصلانو لپاره د تخنیکي او څېړنیزو پروژو د پروپوزلونو د چمتو کولو او پراختیا تر سرلیک لاندې دوه ورځنی علمي او روزنیز ورکشاپ د افغان نړیوال اسلامي پوهنتون د غونډو په عمومي تالار کې ترسره شو.
په دغه ورکشاپ کې د افغان نړیوال اسلامي پوهنتون د کمپیوټر ساینس پوهنځي رئیس دوکتور روحاني روښان او د یاد پوهنځي استادانو ترڅنګ د جرمني هېواد د (Helmholtz-Zentrum Berlin) پوهنتون استاد دوکتور وحیدالله سلیمان خېل، د سلواکیا هېواد د (Slovak University of Technology in Bratislava (STU), Slovakia) پوهنتون استاد دوکتور محمد اسماعیل خطاب او د کابل پوهنتون استاد دوکتور ضیاءالله مومند او ګڼ شمیر محصلانو هم ګډون کړی و.
د ورکشاپ په ترڅ کې د کمپیوټر ساینس پوهنځي د مصنوعي ځیرکتیا او د سافت ویر انجنیري څانګو محصلانو د بېلابېلو څېړنیزو موضوعاتو لپاره د ۱۷چمتو شوي پروپوزلونه د پریزنټېشنونو په بڼه د پنځه کسیز علمي او تخنیکي پلاوي پر وړاندې تر سره شول. په دغه علمي پلاوي کې دوکتور وحیدالله سلیمان خېل، دوکتور محمد اسماعیل خطاب، دوکتور ضیاءالله مومند، د کمپیوټر ساینس پوهنځي رئیس دوکتور روحاني روښان او د کمپيوټر ساینس پوهنځي استاد دوکتور محمد جانس خان شامل وو.
د علمي پلاوو غړو د محصلانو ټول پریزنټېشنونه په دقت وارزول، د څېړنیزو پروپوزلونو علمي او تخنیکي اړخونه یې وڅېړل او د لا ښه والي لپاره یې اړینې علمي سپارښتنې او رغنده نظریات وړاندې کړل.
د یادونې وړ ده، چې د ورکشاپ په وروستۍ برخه کې د استادانو او محصلانو ترمنځ علمي بحث او د نظرونو تبادله ترسره شوه. همدارنګه، د محصلانو پوښتنو ته د متخصصو استادانو له لوري هر اړخیز او قناعت بښونکي ځوابونه وړاندې شول.
چهارشنبه، ۲۱ صفر ۱۴۴۸ هـ.ق.
۱۴ اسد ۱۴۰۵ هـ.ش.
د نشراتو او عامه اړیکو آمریت
