د افغان نړیوال اسلامي پوهنتون د داخلي سړکونو د رغونې پروژه نن سهشنبه، د زمري میاشتې ۱۴مه نېټه، په رسمي ډول پیل شوه.
یاده د سړکونو پروژه چې ۲۵۷۱ متره اوږدوالی لري، د ۲۰،۹۹۷،۴۶۳.۷۵ افغانۍ (شل میلیونه، نهه سوه اووه نوي زره، څلور سوه درې شپېته افغانۍ او پنځه اویا پيسو) په مالي لګښت، د لوړو زده کړو وزارت د قدرمن وزیر، شېخ الحدیث نداء محمد ندیم صاحب په حضور کې پرانیستل شوه.
د مراسمو پیل د قرآن کریم په تلاوت وشو، او ورپسې د افغان نړيوال اسلامي پوهنتون سرپرست رئیس، دوکتور رفیعالله عطاء صاحب ګډونوالو ته د ښه راغلاست وینا ترسره کړه. نوموړي د لوړو زده کړو وزارت د وزیر صاحب د ملاتړ او هڅو ستاینه وکړه، او ویې ویل، چې دا پوهنتون د امریکا تر مستقيم حماېت لاندې وو، خو د تېرو شلو کلونو په ترڅ کې یې سړکونو نه دي قیر شوي، ښاغلي رٸيس صاحب خوښي وښودله، چې د افغانستان ا.ا بيارغونې ته ژمن نظام دى، چې ولس يې فعلاً د خدمتونو شاهد دى.
ورپسې قدرمن وزیر صاحب په خپله وینا کې وویل، چې اسلامي امارت د هېواد د ابادۍ لپاره پر بنسټیزو پروژو تمرکز لري. نوموړي زیاته کړه، چې دا پروژه او ورته نور کارونه د هېواد د داخلي بودیجې له لارې تمویلیږي، او پکې هېڅ بهرنی مالي ملاتړ نشته.
ښاغلي وزیر صاحب د يادې پروژې له قراردادي اکبر نصرت ساختماني شرکت څخه وغوښتل، چې کار باید د کیفیت، وخت او قرارداد له ژمنو سره سم ترسره شي. د شرکت یو استازي د مراسمو پر مهال ډاډ ورکړ، چې پروژه به د پوهنتون د نظارت کمېټې تر څار لاندې، پر وخت او د لوړو معیارونو مطابق بشپړه شي. د یادې پروژې د بنسټ ډبره د محترم وزیر صاحب، د پوهنتون سرپرست رئیس صاحب، د مالي او اداري چارو محترم مرستیال قاري عبدالستار حیدري صاحب او د رهبرۍ د غړو په لاسونو سره کېښودل شوه. مراسم د محصلانو چارو د مرستیال شېخ عبدالمالک نیازي صاحب له لوري په اختتامیه دعاء سره پای ته ورسېدل.
د یادونې وړ ده، چې تر دې وړاندې د زراعت پوهنځي د څېړنیز فارم لپاره هم د ۱،۷۵۰،۰۰۰ افغانیو په لګښت د یوه حلقه څاه د جوړېدو پروژه پیل شوې، چې ډېره ژر به بشپړه شي او ګټې اخيستنې ته به وسپارل شي.
