د اداري عمومي شورا نوبتي غونډه ترسره شوه.

د اداري عمومي شورا نوبتي غونډه ترسره شوه.
د افغان نړیوال اسلامي پوهنتون د ریاست مقام د غونډو په تالار کې د یاد پوهنتون اداري عمومي شورا نوبتي غونډه د پوهنتون سرپرست رئیس پوهندوی دوکتور رفیع الله عطاء په مشرۍ ترسره شوه، چې په کې د علمي چارو، د محصلانو چارو، مالي او اداري چارو،  نړیوالو اړیکو او د څېړنو او علمي مجلې معاونیتونو مرستیالانو او د پوهنځي رئیسانو ګډون درلود.
غونډه د قرآن کریم د مبارکو آیاتونو په تلاوت سره پیل شوه، ورپسې د تېرې اداري شورا فعالیتونو او کړنو راپورونه وړاندې شول. 
غونډه کې  د زراعت او انجینرۍ پوهنځیو لابراتوارونو لپاره د مناسب ځای ټاکلو، د نویو ایجاد شویو برنامو لپاره د ټولګیو منظم کول، د پوهنتون زرغونتیا په موخه د پوهنتون په بېلابېلو برخو کې د نیالګیو کېښنول او د تنظیف کمېټې د فعالیتونو او د چاپېریال د پاکوالي پر اهمیت او په ورته موضوعاتو بحث ترسره شو.
د غونډې په پای کې د پوهنتون مشرتابه ټینګار وکړ، چې د پوهنتون اداره هڅه کوي څو د چارو په تنظیم او د شته ستونزو په حل سره داسې تعلیمي چاپېریال رامنځته کړي، چې محصلین وکولای شي په ارامه او مناسب فضا کې خپلو زده کړو ته دوام ورکړي.
د نشراتو او عامه اړیکو آمریت
۱۴۰۴/۱۲/۴